विकास बैङ्कतर्फ लगानीकर्ता आकर्षित

२०७०-१०-१५ मा प्रकाशित     २३६ पटक पढिएको    ० बिचार / प्रतिक्रिया

मुना कुँवर

माघ १४, काठमाडौं । पछिल्लो समयमा शेयर बजारमा विकास बैङ्कतर्फ लगानीकर्ताको आकर्षण बढ्न थालेको छ । अन्य कम्पनीको तुलनामा विकास बैङ्कको शेयरमूल्य केही कम हुनुका साथै प्रतिफल राम्रो भएका कारण लगानीकर्ताको आकर्षण बढ्न थालेको ब्रोकरहरू बताउँछन् । केही महीनाअघि बीमा र बैङ्किङ समूहको शेयरमा लगानी बढे पनि पछिल्लो समयमा त्यस्तो लगानी विकास बैङ्कको शेयरमा स्थानान्तरण भएको उनीहरूले बताए । ‘माग अत्यधिक भएकाले बीमा र बैङ्किङ समूहको शेयरमूल्य उच्च विन्दुमा पुगेपछि लगानीकर्ताले अन्य विकल्पका रूपमा विकास बैङ्क रोजेको देखिन्छ,’ एक ब्रोकर सञ्चालकले भने । बजारको प्रकृतिअनुसार पनि निश्चित अवधि पछाडि लगानीकर्ताले लगानीको क्षेत्र परिवर्तन गर्ने शेयर विश्लेषकहरू बताउँछन् ।

पुराना लगानीकर्ता र आफन्तबाटै ठगिन्छन् नयाँ लगानीकर्ता

२०७१-०३-९ मा प्रकाशित    

मुना कुँवर

असार ८, काठमाडौं । पाल्पाकी जानुका श्रेष्ठ स्टाफ नर्स हुन् । उनी अहिले काठमाडौंमै कार्यरत छिन् । दिन–रात गरी आम्दानी गरेको रकम उनी उचित क्षेत्रमा लगानी गर्न चाहन्थिन् । त्यसैले उनले शेयर बजारमा लगानी गर्ने योजना बनाइन् । तर, शेयर खरीद गर्ने विषयमा उनलाई जानकारी भने थिएन । यसैबीच, एकजना पुराना लगानीकर्तासँग उनको भेट भयो । आफूलाई केही जानकारी नभएकाले उनी तिनै लगानीकर्ताको पछि लागिन् । उनको सल्लाहअनुसार उनले एउटा विकास बैङ्कमा रू. १ लाख ५० हजार लगानी गरिन् । तर, उनले खरीद गरेको केही दिनमा नै सो बैङ्कको शेयरमूल्य आधा घट्यो । उनी छाँगाबाट खसेजस्तै भइन् । राम्रो मुनाफा कमाउने उनको सपना चकनाचुर भयो । त्यसैले उनले ती लगानीकर्तालाई पुनः सम्पर्क गर्न खोजिन् । तर, अहिलेसम्म सम्पर्क हुन नसकेको उनले बताइन् । आफूलाई लगानीबारे थाहा नहुँदा आफ्नो रकम फसेको उनले बताइन् । ‘पुराना लगानीकर्तालाई त राम्रो जानकारी होला भनेर विश्वास गरेँ,’ उनले भनिन् ‘तर, उनले मलाई फसाएका रहेछन् ।’ उनले भनिन्, ‘त्यो बैङ्कको शेयर घट्ने उनलाई पहिले नै अनुमान रहेछ, त्यसैले शेयर खरीद नगर्ने बेलासम्म उनले मेरो पीछा छोडेनन् ।’ उनले शेयरमूल्य घट्ने अवस्था देखेर आफनै शेयर मलाई भिडाएका रहेछन् । अहिले उनलाई ठूलो पछुतो लागेको छ ।