संस्थाको सफलतामा कर्मचारीको ठूलो भूमिका हुन्छ

मुना कुँवर

विनोदप्रसाद मिश्र
प्रमुख, मानव संसाधन विभाग, जीफोरएस सेक्युरिटिज सर्भिस नेपाल

जीफोरएस सेक्युरिटिज सर्भिस नेपाल सुरक्षा सेवा प्रदान गर्ने नेपालकै पहिलो कम्पनी हो । यो कम्पनी ‘जीफोरएस लण्डन’को सब्सिडियरी कम्पनी हो । लण्डनमा १ सय वर्षअगाडि स्थापित यस कम्पनीको स्थापना नेपालमा भने २०५३ सालमा भएको हो । कम्पनीको मुख्य कार्यालय काठमाडौंको लाजिम्पाटमा छ । नेपालमा कम्पनीको चारओटा शाखा र सातओटा उपशाखा सञ्चालनमा छन् । यसैगरी कम्पनीले धनगढीमा क्षेत्रीय तालीम केन्द्र सञ्चालन गर्दै आएको छ । सेवाग्राहीलाई गुणस्तरीय सेवा प्रदान गर्नु आफ्नो उद्देश्य रहेको कम्पनीले बताएको छ । हाल यस कम्पनीमा ५ हजार कर्मचारी कार्यरत छन् । व्यवस्थापनको रणनीति, कर्मचारीको परिचालन, छनोटलगायत विषयमा अभियान संवाददाता मुना कुँवरले कम्पनीका मानव संसाधन विभाग प्रमुख विनोदप्रसाद मिश्रसँग गरेको कुराकानीको सार :

नेपालको मानव संसाधन व्यवस्थापनको अवस्थालाई कसरी मूल्याङ्कन गर्नुहुन्छ ?
नेपालमा भर्खरैमात्र उद्योगको स्थापना हुन थालेको छ । त्यसैले पनि नेपाली बजार त्यति व्यावसायिक हुन सकेको छैन । पछिल्लो समयमा भने नेपालमा पनि केही अन्तरराष्ट्रिय कम्पनी सञ्चालनमा आउन थालेका छन् । त्यस्ता कम्पनीसँगै अन्तरराष्ट्रिय संस्कृतिको अभ्यासको समेत सिको गर्न थालिएको छ, जसको फलस्वरूप नेपालमा मानव संसाधनको अवधारणा शुरू भएको छ । नेपालमा उद्योगधन्दाको स्थापना हुन थालेसँगै कर्पोरेट कल्चरमा आधारित मानव संसाधनको पनि अभ्यास हुन थालेको छ । यो सकारात्मक पक्ष हो । एक दृष्टिकोणले हेर्दा मानव संसाधन विभाग कुनै पनि कम्पनीका लागि अतिरिक्त खर्चसमेत हो । त्यसैले, कतिपय कम्पनीले चाहेर पनि यसलाई कार्यान्वयन गर्न सकिरहेका छैनन् । तसर्थ, कम्पनीको आर्थिक अवस्था र बजारको अवस्थाअनुसार यसको अभ्यास गर्नुपर्छ ।

निर्वाचनको खर्च शेयर बजारमा

मुना कुँवर

काठमाडौं । दोस्रो संविधानसभाको निर्वाचनमा सरकार तथा राजनीतिक दलहरूले खर्च गरेको रकमको ठूलो हिस्सा विभिन्न माध्यमबाट शेयर बजारमा लगानी भएको अनुमान गरिएको छ । त्यसले गर्दा निर्वाचन सम्पन्न भएलगत्तै शेयर बजारमा अस्वाभाविक वृद्धि देखिएको सरोकारवालाहरूले बताएका छन् । ‘संविधानसभा चुनावमा सरकार तथा राजनीतिक दलहरूले प्रचारप्रसारका साथै मतदातालाई प्रभावित गर्नका लागि खर्च गरेको अर्बौँ रुपैयाँ बैङ्किङ प्रणालीमा फिर्ता नआएपछि सहकारी संस्था वा नगदै वा अन्य विभिन्न माध्यम हुँदै शेयर बजारमा प्रवेश गरेको बुझिन्छ,’ एक शेयर लगानीकर्ताले अभियानसँग भने ।

निर्वाचनमा भएको कुल खर्चको केही हिस्सा (करीब रू. २० अर्ब) बैङ्किङ प्रणालीमा निक्षेपका रूपमा थपिएको, केही हिस्सा अनौपचारिक क्षेत्रमै थन्किएको वा विदेश पलायन भएको हुनाले कम्तीमा एक चौथाइ शेयर बजारमा आएको अर्थविद्हरूको भनाइ छ । ‘कुल खर्चको १५ देखि २० प्रतिशत रकम शेयर बजारमा लगानी भएको हुन सक्छ,’ अर्थविद् चन्द्रमणि अधिकारीले बताए । उनका अनुसार केही रकम बैङ्किङ प्रणालीमा आए पनि तराई क्षेत्रमा खर्च भएको रकम भारततर्फ पलायन भएको अनुमान छ । बाँकी रकम भने उपभोग्य वस्तुमा नै खर्च भएको छ । नेपालको जस्तो सानो शेयर बजारमा कुल खर्चको १५–२० प्रतिशत पनि ठूलो रकम भएकाले शेयर बजारमा उच्च वृद्धि भएको उनको विशलेषण छ ।