आगामी वर्ष बीमा व्यवसाय २५ प्रतिशतले बढ्ने अनुमान

 २०७२-०५-१७ मा प्रकाशित        

मुना कुँवर

भदौ १६, काठमाडौं । आगामी वर्षमा नेपालको बीमा व्यवसाय २५ प्रतिशतले वृद्धि हुने अनुमान गरिएको छ । गत वैशाखको भूकम्पपछि मानिस बीमाप्रति सचेत भएकाले बीमा व्यवसाय बढ्ने बीमकहरूले अनुमान गरेका छन् । भूकम्पले जनधनको धेरै क्षति गरेपछि बीमाप्रति मानिसको आकर्षण बढ्न थालेको नेशनल इन्स्योरेन्सका प्रमुख कार्यकारी अधिकृत डा.प्रोणव सेनले बताए । उनले भने, ‘आगामी वर्ष नेपालको बीमा व्यवसाय २० देखि ३० प्रतिशतले बढ्नेछ ।’

हाल नेपालमा सञ्चालित बीमा कम्पनीहरूले वार्षिक रू. २४ अर्बबराबरको व्यवसाय गर्ने गर्छन् । कम्पनीहरूको वार्षिक व्यवसाय वृद्धिदर १० देखि १५ प्रतिशत रहेको अध्ययनले देखाएको छ । बीमकहरूको अनुमानअनुसार व्यवसाय बढेमा आगामी वर्ष कम्पनीहरूको व्यापार रू. ६ अर्बले वृद्धि भएर रू. ३० अर्ब पुग्नेछ ।

भूकम्पपछि कम्पनीहरूबाट बीमा योजना जारी हुने क्रम बढेको छ । कम्पनीमा बीमासम्बन्धी सोधपुछ तथा जानकारी लिन आउनेको सङ्ख्या पनि बढेको नेशनल इन्स्योरेन्सका प्रमुख कार्यकारी अधिकृत सेनले बताए । उनले भने, ‘दैनिक नयाँ नयाँ व्यक्ति सोधपुछका लागि आइरहेका छन् ।’ त्यस्तै, अहिलेसम्म अण्डर इन्स्योरेन्स गरेका बीमितहरूले सम्पत्तिको पूर्ण बीमा गर्न थालेको उनले बताए । त्यसैले आगामी वर्षदेखि अण्डर इन्स्योरेन्सको समस्या पनि समाप्त हुने उनले बताए । किनभने धेरै बीमितहरूले अहिले अण्डर इन्स्योरेन्सका कारण ठूलो आर्थिक क्षति बेहोरेका छन् ।

भैपरी आउने आर्थिक विपत्तिबाट बच्न बीमा सबैभन्दा उत्तम विकल्प भए पनि नेपालको कुल जनसङ्ख्याको करीब ७ प्रतिशतले मात्र बीमा गरेको एक अध्ययनले देखाएको छ । नेपालमा सरकारले बाध्यकारी बनाएको (तेस्रो पक्ष) तथा बैङ्कले बाध्यकारी बनाएको (कर्जा) बीमा मात्रै बढी प्रचलनमा छन् । अन्य योजना भने मानिसले मुश्किलले खरीद गर्ने गरेको देखिन्छ ।

वैशाखपछि भने मानिसले बीमाको आवश्यकता महसूस गर्न थालेका छन् । त्यसैले बीमा व्यवसाय ह्वातै बढ्ने अनुमान गरिएको थियो । तर, अनुमान गरिएजस्तो मानिस बीमाप्रति आकर्षित नभएको बताउँछन् सिद्धार्थ इन्स्योरेन्सका प्रमुख कार्यकारी अधिकृत वीरेन्द्र बैदावर क्षत्री । उनले भने, ‘भूकम्पलगत्तै मानिस धनजनको अत्यधिक क्षतिका कारण आत्तिएका थिए ।

त्यसैले बीमाका लागि मानसिक रूपमा तयार पनि थिए ।’ तर, समयसँगै पीडालाई मानिसले बिर्सन थालेको उनले बताए । त्यसैले सोचेजति बीमा व्यवसाय वृद्धि हुन नसकेको उनको भनाइ छ । यद्यपि पहिलेको तुलनामा भने आगामी वर्ष २० देखि २५ प्रतिशतले बीमा व्यवसाय बढ्ने उनले बताए ।

मुलुकमा अचानक यति ठूलो क्षति हुँदा पनि मानिस बीमाप्रति हुनुपर्ने जति सचेत नभएको सगरमाथा इन्स्योरेन्सका प्रमुख कार्यकारी अधिकृत कृष्णबहादुर बस्नेतको भनाइ छ । उनले भने, ‘मानिसले विस्तारै भूकम्पको पीडालाई बिर्सन थालेका छन् ।’ तर, दुर्घटना कुनै पनि बेला हुनसक्ने भएकाले सतर्कता अपनाउनु पर्नेमा उनको जोड छ ।