नेपालमा पहिलोपटक ‘स्टोन कोटेड टायल रुफिङ’ ल्याएका छौं

मुना कुँवर

 

पूर्ण चालिसे
सञ्चालक, ब्लिसजोन इण्टरप्राइजेज

नेपालमा पहिलोपटक ‘स्टोन कोटेड टायल रुफिङ’ ल्याएका छौं

नेपालमा फर्निचर व्यवसाय फस्टाउँदै गएको हो ?

हो, नेपालमा फर्निचर व्यवसाय फस्टाउँदै गएको छ । मानिसको आवश्यक उपभोग्य सामग्रीभित्र फर्निचर पनि पर्छ । सामान्य स्तरको व्यक्तिदेखि उच्चस्तरको मानिसले यसको प्रयोग गर्छन् । त्यसैले पनि यो व्यवसाय वृद्धि हुन गएको हो । अर्कोतिर, बसाइसराइको क्रम तीव्र हुँदै गएको छ । मानिस शहरकेन्द्रित हुँदै जान थालेका छन् । यसले गर्दा पनि फर्निचर व्यवसाय अझ फस्टाउन सकेको हो ।

उपभोक्ताको फर्निचर खरीद गर्ने प्रवृत्तिमा कत्तिको परिवर्तन आएको देख्नुहुन्छ ?

उपभोक्ताको फर्निचर खरीद प्रवृत्तिमा परिवर्तन आएको हामी सहजै अनुमान लगाउन सक्छौं । आजभन्दा केही वर्षअघि मात्रै नेपाली बजारमा स्वदेशी उत्पादनको वर्चस्व थियो । सबै व्यक्तिले स्वेदशी काठबाट निर्मित फर्निचर नै प्रयोग गर्थे । आवश्यकताका लागि होस् वा शौखका लागि नेपाली उत्पादनको नै प्रयोग हुन्थ्यो । तर, अहिले यो खरीद प्रवृत्तिमा परिवर्तन आएको छ । बजारमा अन्तरराष्ट्रिय उत्पादनका फर्निचर पनि भित्रिन थालेका छन् । यसले उपभोक्तालाई छनोट गर्ने अवसर प्रदान गरेको छ । यस्तो अवस्थामा उच्चवर्गका मानिस अन्तरराष्ट्रिय उत्पादनका सामग्रीप्रति आकिर्षत हुन थालेका छन् । यसको एउटा कारण भनेको विप्रेषण पनि हो । विप्रेषणले मानिसको आर्थिक स्तर उकासेको छ । यसले गर्दा मानिस शौखिन हुँदै गएका छन् ।

फर्निचर छनोट गर्दा उपभोक्ताले ध्यान दिनुपर्ने विषय के हुन् ?

उपभोक्ताले फर्निचर खरीद गर्दा गुणस्तरलाई नै प्राथमिकता दिनुपर्छ । बजारमा हेर्दा उस्तै देखिने धेरै प्रकारका फर्निचर छन् । उस्तै देखिने भए पनि पनि तिनको मूल्य र गुणस्तरमा भिन्नता छ । तर, सामान्य उपभोक्ताले फर्निचरमा फरक छुट्ट्याउन सक्दैनन् । यसका लागि फर्निचर खरीद गर्नुअघि दुईतीनओटा पसलमा गएर फर्निचरको विषयमा बुझ्नुपर्छ । फर्निचरको मूल्य तथा गुणस्तर दाँजेर हेर्नुपर्छ । त्यसपछि मात्रै गुणस्तरीय फर्निचर छुट्ट्याउन सकिन्छ । केही रकम बढी तिरेर भए पनि गुणस्तरीय फर्निचर खरीद गर्नु नै उपयुक्त हुन्छ ।

फर्निचर व्यवसायीले केकस्ता समस्या भोग्नुपरेको छ ?

फर्निचर व्यवसायको प्रमुख समस्या भनेको नै राजनीति हो । त्यसपछि सरकारी कर्मचारीको खराब नियत आउँछ । यिनीहरू हाम्रो व्यवसायका लागि मात्रै नभई सबै व्यवसायका लागि समस्या हुन् । सामग्री भन्सारदेखि शोरूमसम्म ल्याइपुर्‍याउँदा कर्मचारीले धेरै दुःख दिन्छन् । नीतिनियमलाई अनावश्यक र झन्झटिलो बनाइदिन्छन् । एक दिनमा हुने काम १ महीना लगाइदिन्छन् । यस्ता समस्याले व्यवसायीलाई निरुत्साहित गर्छ ।

तपाईंले विक्री गर्ने फर्निचरको विशेषता के हो ?

नेपालमा अन्तरराष्ट्रिय फर्निचर व्यवसायीको सङ्ख्या न्यून छ । सीमित सङ्ख्यामा रहेका व्यवसायीले एकलौटी रूपमा व्यवसाय गर्दै आएका छन् । उनीहरूले आफनो इच्छाअनुसार फर्निचरको मूल्य तोकेका छन् । त्यसैले, अन्तरराष्ट्रिय उत्पादनको फर्निचरको मूल्य अधिक हुने भ्रम मानिसमा छ । तर, यो वास्तविकता भने होइन । त्यसैले, सबैभन्दा पहिला त हामीले यस्तो भ्रमलाई तोडेका छौं । न्यून मार्जिन राखी उपभोक्तालाई फर्निचर उपलब्ध गराएका छौं, जुन सामान्य व्यक्तिको बजेटभित्र पनि आउँछ । यसैगरी हामीले नेपालमा पहिलोपटक ‘स्टोन कोटेड टायल रुफिङ’ (ढुङ्गाजस्तो देखिने टायल) भित्र्याएका छौं । नमूनाको रूपमा हामीले केही ‘पिस’ राखेका छौं । यस टायलका धेरै फाइदा छन् । यसले आकाशबाट झर्दा आउने पानीको आवाज सोस्छ । तापक्रम सन्तुलित बनाइराख्छ, खिया लाग्दैन । हामीले यस टायलमा २५ वर्ष वारेण्टी दिएका छौं । यीबाहेक ‘बेडकम सोफा’ पनि हामीले भित्र्याएका छौं । आवश्यकताअनुसार यो सोफालाई बेडको आकारमा पनि परिवर्तन गर्न सकिन्छ । त्यसैले, यसको नाम ‘बेडकम सोफा’ राखिएको हो । ‘रोतान सोफा’ पनि अर्को आकर्षक फर्निचर हो । यो सोफाको संरचना बासको चोयाजस्तो देखिन्छ । त्यस्तै, हामीले  रिक्लाइन सोफा, मलेसियन काठबाट बनेको डाइनिङ टेबल, फोल्डिङ डाइनिङ टेबल, यूरोपियन डिजाइनका बेडलगायत फर्निचर नेपाल भित्र्याएका छौं । साथै उपभोक्ताको आवश्यकतालाई दृष्टिगत गरी हामीले इण्टेरियर डिजाइनको काम पनि गर्दै आएका छौं ।

फर्निचर कहाँबाट आयात गर्नुहुन्छ ?

विभिन्न मुलुकमा उत्पादन गरिएका फर्निचर नेपाली बजारमा पाइन्छन् । थाइल्याण्ड, ताइवान, चीन र केही व्यवसायीले यूरोपियन देशबाट पनि फर्निचर आयात गरेको सुनिन्छ । तर, हामीले भने मलेसिया, भियतनाम, चीनबाट फर्निचर आयात गरिरहेका छौं । फर्निचरका विभिन्न भाग फरकफरक मुलुकबाट ल्याई जडान गर्ने कम पनि गर्छौं ।

तपाईंहरूको योजना के छ ?

नेपालमा सञ्चालित अन्तरराष्ट्रिय फर्निचर व्यवसाय काठमाडौंमा मात्रै केन्द्रित छ । तर, हामी यो व्यवसायलाई काठमाडौंबाहिर पनि विस्तार गर्ने योजनामा छौं । १ वर्षभित्रमै हामीले हाम्रो शाखालई भक्तपुर, कलङ्की, पोखरा, बुटवल, विराटनगरमा विस्तार गर्दै छौं । निकट भविष्यमा नेपालमा नै बाँसका फर्निचर उत्पादन गरी यूरोपियन बजारमा निर्यात गर्ने सोच बनाएका छौं ।  

http://www.abhiyan.com.np/new/Articles/view/28652