जीवन बिमा कम्पनीलाई बोनसको दबाब

नयाँ जीवन बिमा कम्पनी आएपछि बोनसको दर बढाउँदै पुराना कम्पनी

नेपालको जीवन बिमा व्यवसायमा नयाँ कम्पनीहरू थपिएसँगै पुराना कम्पनीलाई बोनसको दबाब पर्न थालेको छ । सोहीकारण गत वर्ष बोनसदर घोषणा गरेका ६ वटा जीवन बिमा कम्पनीले तुलनात्मक रूपमा बोनसदर बढाएका छन् ।

जीवन बिमा कम्पनीले बिमितहरूलाई भुक्तान गर्ने प्रतिफललाई बोनसदर भनिन्छ । बिमा कम्पनीहरूले आर्जन गरेको मुनाफाको आधारमा प्रतिवर्ष बोनसदर निर्धारण गरिन्छ । यस्तो बोनसदर कम्पनीले जारी गर्ने पोलिसीमा फरक–फरक हुन्छ ।

गत आवमा ६ कम्पनीले निर्धारण गरे बोनसदर
६ वटा जीवन बिमा कम्पनीले गत आवको बोनसदर निर्धारण गरेका छन् । सञ्चालनमा रहेको नौवटा जीवन बिमा कम्पनीमध्ये ६ वटाले मात्रै आर्थिक वर्ष २०७३/७४ को बोनसदर निर्धारण गरेका हुन् । नेपाल लाइफ, लाइफ इन्स्योरेन्स कर्पोरेसन, मेटलाइफ, एसियन लाइफ, सूर्या लाइफ र प्राइम लाइफ इन्स्योरेन्स कम्पनीले बोनसदर निर्धारण गरेका छन् ।

एसियनले ग-यो ब्रेक थ्रु
एसियनले लाइफले पाँच वर्षको अवधिमा बोनसदरमा तीव्र वृद्धि गरेको छ । आव ०७३/७४ को लागि कम्पनीले अधिकतम प्रतिहजार ८५ रुपैयाँ बोनसदर निर्धारण गरेको छ । यो रकम अन्य नेपालमा सञ्चालित कम्पनीहरूमा सबैभन्दा बढी हो । कम्पनीको न्यूनतम बोनसदर प्रतिहजार ४१ रुपैयाँ रहेको छ । आव ०६९/७० मा भने कम्पनीले न्यूनतम प्रतिहजार २५ रुपैयाँ र अधिकतम प्रतिहजार ६८ रुपैयाँ निर्धारण गरेको थियो ।

स्थिर छ नेपाल लाइफको बोनसदर
नेपाल लाइफ इन्स्योरेन्स कम्पनीको बोनसदर पाँच वर्षदेखि स्थिर देखिएको छ । अधिकतम बोनस वितरण गर्ने अग्रपंक्तिमा रहेको नेपाल लाइफले गत आवमा प्रतिहजार ३ रुपैयाँ वृद्धि गरेको छ । कम्पनीले आव ०७३/७४ का लागि न्यूनतम प्रतिहजार ६५ रुपैयाँ र अधिकतम प्रतिहजार ८२ रुपैयाँ बोनस कायम गरेको छ । यसअघिका चार वर्षमा कम्पनीले न्यूनतम प्रतिहजार ६२ रुपैयाँ र अधिकतम प्रतिहजार ८२ रुपैयाँ वितरण गरेको थियो ।

प्राइमले पनि बढाउँदै छ बोनस
प्राइम लाइफ इन्स्योरेन्सले पनि बोनसदर वृद्धिमा जोड दिएको छ । कम्पनीले आव २०७३/७४ का लागि अधिकतम प्रतिहजार ७५ रुपैयाँ बोनसदर निर्धारण गरेको छ । यो रकम विगत पाँच वर्षको तुलनामा प्रतिहजार १२ रुपैयाँले बढी हो । कम्पनीले न्यूनतम प्रतिहजार ३५ रुपैयाँ निर्धारण गरेको छ । यो रकम पाँच वर्षको तुलनामा प्रतिहजार १६ रुपैयाँले बढी हो । आव ०६९/७० कम्पनीको बोनसदर अधिकतम प्रतिहजार ६३ रुपैयाँ र न्यूनतम प्रतिहजार १९ रुपैयाँ थियो ।

यसरी वितरण हुन्छ बोनस
जीवन बिमा कम्पनीहरूले बिमा कोषमा जम्मा भएको रकम विभिन्न क्षेत्रमा लगानी गर्छन् । यसरी गरिएको लगानीको आम्दानीबाट कम्पनीको सबै दायित्व र खर्च घटाएपछि बाँकी रहने आम्दानी बिमितहरूलाई बोनसदरका रूपमा वितरण गरिन्छ । सामान्य सावधिक जीवन बिमामा बिमा अवधि सकिएपछि कम्पनीले बिमा रकम र सो अवधिसम्मको बोनस रकम बिमितलाई एकमुष्ट फिर्ता गर्छन् । यसबाहेक कम्पनीहरूले अन्य प्रकारका बोनस पनि वितरण गर्दै आएका छन् ।

नेपाली बिमा कम्पनीहरूले प्रदान गर्ने बोनसदर तुलनात्मक रूपमा अधिक भएको नेपाल लाइफ इन्स्योरेन्स कम्पनीका प्रमुख कार्यकारी अधिकृत विवेक झाले बताए । ‘अन्य मुलुकको तुलनामा नेपाली कम्पनीहरूले दिने बोनस राम्रो छ । त्यसैले जीवन बिमा लगानी र बचतको राम्रो उपकरण हो,’ उनले भने ।

विभिन्न खालका बोनसहरू

मुनाफामा सरिक हुने बोनसदर : बिमा कम्पनीहरूले आर्जन गरेको मुनाफाको आधारमा वितरण हुने बोनसलाई मुनाफामा सरिक हुने बोनसदर भनिन्छ । ययमा बिमितले कम्पनीले नाफा आर्जन गरेअनुसार बोनस प्राप्त गर्छन् । त्यसैगरी कम्पनीहरूले मुनाफामा सरिक नहुने गरी पनि बोनस वितरण गर्छन् ।

नगद फिर्ता बोनस योजना : बिमा अवधि सकिनुअगावै समय समयमा भुक्तान गरिने बोनसलाई नगद फिर्ता बोनस योजना भनिन्छ । यस्तो बोनस नगद फिर्ता बिमा योजनामा प्रयोग हुन्छ । निश्चित अवधिमा कम्पनीले बिमा रकमसँगै बोनस पनि फिर्ता गर्छ । बाँकी रहेको बोनस बिमा अवधि सकिएसँगै फिर्ता गर्छ ।

संयुक्त बोनस योजना : यस्तो खालको योजनामा कम्पनीले बिमा गरेको वर्ष र दोस्रो वर्षको बोनस रकम संयुक्त रूपमा प्रदान गर्छ । यो योजनाअन्तर्गत बिमा अवधि नसकिँदै बिमितको मृत्यु भएमा वा बिमा अवधि सकिएमा बोनससहित बिमा रकम प्रदान गर्छ ।

अन्तरिम बोनस योजना : कम्पनीहरूले प्रत्येक आर्थिक वर्षको अन्त्यमा बिमांकी मूल्यांकन गरेर बोनसदर निर्धारण गर्छ । तर, आव नसकिँदै बिमा अवधि समाप्त भएका बिमा योजनाको हकमा भने बिमितलाई नोक्सान नहुने गरी निर्धारण गरिने बोनदरलाई अन्तरिम बोनस योजना भनिन्छ ।

http://www.nayapatrikadaily.com/2018/09/26/98728/