विप्रेषण आप्रवाह १४ प्रतिशत बढ्यो

मुना कुँवर

चालू आर्थिक वर्ष २०७०/७१ को साउनको तुलनामा असोजमा विप्रेषण आप्रवाहमा १४ दशमलव ४ प्रतिशत बढेको छ । साउनमा २३ दशमलव ८ प्रतिशत वृद्धि भएको विप्रेषण असोजमा भने ३८ दशमलव २ प्रतिशत बढेको छ । असोज र कात्तिकमा नेपालीका दशैं, तिहार, छठ तथा इदजस्ता ठूला पर्व परेकाले पनि विप्रेषणको आप्रवाह बढेको अर्थविद् चन्द्रमणि अधिकारीले बताए ।

राष्ट्र बैङ्कको तथ्याङ्कअनुसार साउनमा रू. ८८ अर्ब ४ करोड विप्रेषण आप्रवाह भएकोमा असोजमा बढेर रू. १ खर्ब ३५ अर्ब ३ करोड पुगेको छ । भदौमा भने ३४ दशमलव ७ प्रतिशत वृद्धि भई रू. ८८ अर्ब ४ करोड आप्रवाह भएको थियो । चाडपर्व पर्नु तथा डलरको मूल्य बढ्नुले पनि असोजमा विप्रेषण आप्रवाह बढ्नमा थप सहयोग पुगेको वैदेशिक रोजगारविद् डा. गणेश गुरुङले बताए ।

विप्रषेणको आप्रवाह दर बढिरहे पनि वैदेशिक रोजगारीका लागि विदेश जानेको सङ्ख्या भने ह्वातै घटेको छ । चालू आर्थिक वर्षको साउनको तुलनामा असोज तथा कात्तिकमा विदेश जानेको सङ्ख्या ४४ प्रतिशत घटेको छ । त्यस्तै, भदौमा भने ९० प्रतिशत घटेको छ । भ्रष्टाचार गरेको अभियोगमा अख्तियार दुरुपयोग अनुसन्धान आयोगले अन्तरराष्ट्रिय विमानस्थल अध्यागमन विभाग र वैदेशिक रोजगार प्रवर्द्धन विभागका कर्मचारीलाई पक्राउ गरेपछि विभागको कार्य सञ्चालनमा सुस्तता आएको बताउँछन् डा. गुरुङ । कर्मचारी पक्रिएको आवेगका कारण रोजगार विभाग तथा अध्यागमन विभागले कामदारको भिसा प्रक्रियामा कडाइ गरेको उनको भनाइ छ । विभागका कर्मचारीले सेवाग्राहीलाई अनावश्यक झञ्झट दिई प्रक्रिया लम्ब्याउने गरेकोसमेत उनले बताए ।

वैदेशिक रोजगार विभागका निर्देशक दिवस आचार्यले भने रोजगार व्यवसायीले सञ्चालन गरेको आन्दोलनका कारण विभागको काममा अवरोध सृजना भएको हो । एकातिर आन्दोलन तथा अर्कोतर्फ असोज र कात्तिकमा चाडपर्व परेका कारण पनि विदेश जानेको सङ्ख्या घटेको उनको भनाइ छ । उनका अनुसार कतिपय कामदारले संविधानसभा चुनावको कारण विदेश जाने मिति सारेका थिए ।  

वैदेशिक रोजगार विभागको तथ्याङ्कअनुसार साउनमा विदेश जानेको सङ्ख्या ४५ हजार ९ सय ३७ थियो । त्यसमध्ये पुरुष ४३ हजार २८ र महिला २९ हजार ९ छन् । तर, कात्तिकमा यो सङ्ख्या घटेर ३१ हजार ९ सय ४९ मा सीमित भएको छ । त्यसमध्ये पुरुष २९ हजार ५ सय ६४ र महिला २३ हजार ८५ छन् । त्यसैगरी असोजमा भने ३१ हजार ९ सय ५९ व्यक्ति रोजगारीका लागि विदेश गएका छन् । भदौमा भने जम्मा २४ हजार १ सय ६४ व्यक्ति रोजगारीका लागि विदेश गएको विभागको तथ्याङ्क छ ।

http://www.abhiyan.com.np/new/Articles/view/34976